శత్రుచర్ల రాజీనామా చేస్తానన్నారు: దానం

హైదరాబాద్: మంత్రి శత్రుచర్ల విజయరామరాజు రాజీనామాకు సిద్ధపడిన విషయం నిజమేనని రాష్ట్ర వైద్య, ఆరోగ్య శాఖ మంత్రి దానం నాగేందర్ అన్నారు. మంత్రులపై ముఖ్యమంత్రి రోశయ్య ఆగ్రహం వ్యక్తం చేసిన సందర్భంలో తాను రాజీనామా చేస్తానని శత్రుచర్ల అన్నట్లు శుక్రవారం వార్తలు వచ్చాయి. ఆ వార్తలపై దానం నాగేందర్ శుక్రవారం మీడియా ప్రతినిధులతో ఆ విధంగా అన్నారు. రాజీనామాకు శత్రుచర్ల చూపిన కారణాలను మాత్రం మీడియా వక్రీకరించిందని ఆయన అన్నారు. ముఖ్యమంత్రి రోశయ్య మనోవేదనకు గురి కావడం చూసి బాధతో శత్రుచర్ల ఆ ప్రతిపాదన చేశారని చెప్పారు. మంత్రివర్గంలో ఏ విధమైన విభేదాలు లేవని ఆయన అన్నారు.

ముఖ్యమంత్రి ఏకపక్షంగా నిర్ణయాలు తీసుకోవడం లేదని, మంత్రివర్గం ఉమ్మడిగానే నిర్ణయాలు చేస్తోందని ఆయన చెప్పారు. దివంగత నేత వైయస్ రాజశేఖర రెడ్డి ప్రవేశపెట్టిన సంక్షేమ పథకాలను సమర్థంగా కొనసాగిస్తున్న ముఖ్యమంత్రికి తమ మద్దతు ఉంటుందని ఆయన చెప్పారు. హైదరాబాద్ ఎమ్మెల్సీ స్థానానికి తెలుగుదేశం పోటీ చేయడం అనైతికమని ఆయన అభిప్రాయపడ్డారు.