టిడిపి పగ్గాలు తీసుకుంటా: బాలకృష్ణ

హైదరాబాద్: అవసరమైతే తెలుగుదేశం పార్టీ పగ్గాలను తన చేతుల్లోకి తీసుకుంటానని ప్రముఖ సినీ నటుడు బాలకృష్ణ అన్నారు. సాక్షి టీవీ చానెల్ కు ఇచ్చిన ఇంటర్వ్యూలో ఆయన ఆ విధంగా అన్నారు. అవకాశం వస్తే వెనక్కి తగ్గేది లేదని, పార్టీ పగ్గాలు చేపడతానని ఆయన అన్నారు. అయితే ఇప్పుడు దానిపై ఏ విధమైన నిర్ణయం తీసుకోలేదని ఆయన స్పష్టం చేశారు. భవిష్యత్తు ఎలా ఉంటుందో చెప్పలేనని ఆయన అన్నారు.

నందమూరి వంశానికి చెందిన బాలకృష్ణ తెలుగుదేశం పార్టీ పగ్గాలు చేపట్టాలని పార్టీ కార్యకర్తలు, అభిమానులు చాలా కాలం నుంచి డిమాండ్ చేస్తూ వస్తున్నారు. బాలయ్య పార్టీ పగ్గాలు చేపడితే మంచిదని స్వర్గీయ ఎన్టీ రామారావు సతీమణి లక్ష్మీపార్వతి ఇటీవల అన్నారు. బాలకృష్ణ ముఖ్యమంత్రి అవుతారని నందమూరి వంశానికి చెందిన తారకరత్న వంటి నటులు అంటూ వస్తున్నారు. ఈ నేపథ్యంలో బాలకృష్ణ మాటలకు ప్రాధాన్యం ఏర్పడింది.