రాజకీయాల్లోకి రాకుండా ఆపలేరు: బాలయ్య

నల్లగొండ: దైవానుగ్రహం ఉంటే రాజకీయాల్లోకి రాకుండా తనను ఎవరూ ఆపలేరని ప్రముఖ సినీ నటుడు బాలకృష్ణ అన్నారు. తెలుగుదేశం పార్టీకి తన సేవలు అందిస్తానని ఆయన అన్నారు. సింహా చిత్రం విజయం సాధించడంతో ఆయన మంగళవారం నల్లగొండ జిల్లాలోని యాదగిరి గుట్ట నరసింహ స్వామిని దర్శించుకుని ప్రత్యేక పూజలు చేశారు. ఈ సందర్భంగా ఆయన మీడియా ప్రతినిధులతో మాట్లాడారు. సమయం వచ్చినప్పుడు తప్పకుండా పార్టీ పగ్గాలు చేపడుతానని ఆయన అన్నారు.

నరసింహ పేరుతో వచ్చిన తన సినిమాలన్నీ విజయం సాధించాయని, దైవానుగ్రహం వల్లనే తన సినిమాలు విజయం సాధించాయని ఆయన అన్నారు. తాను చేయాల్సిన సినిమాలు ఇంకా చాలా ఉన్నాయని ఆయన అన్నారు. సింహ చిత్రానికి విజయం సాధించి పెట్టిన ప్రేక్షకులకు, అభిమానులకు ఆయన కృతజ్ఞతలు చెప్పారు.