జగన్ కు దీటుగా తెలంగాణ యాత్ర

హైదరాబాద్: కాంగ్రెసు తెలంగాణ పార్లమెంటు సభ్యులు తమ ప్రాంతంలో ఆత్మ విశ్వాస యాత్ర చేపట్టాలని నిర్ణయం తీసుకున్నారు. తమ సహచర సభ్యుడు సర్వే సత్యనారాయణ నివాసంలో వారు శుక్రవారం సమావేశమై ఆ మేరకు నిర్ణయం తీసుకున్నారు. తెలంగాణ ఇచ్చేది, తెచ్చేది కాంగ్రెసు పార్టీయేనని, అందుకు తమ యుపిఎ ప్రభుత్వం హామీ ఇచ్చిందని వారు తమ యాత్రలో తెలంగాణ ప్రజలకు వివరించనున్నారు. తమ పార్టీ పార్లమెంటు సభ్యుడు వైయస్ జగన్ ఓదార్పు యాత్రకు దీటుగా ఈ ఆత్మ విశ్వాస యాత్రను చేపట్టాలని వారు నిర్ణయించుకున్నారు.

అదే సమయంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ప్రాబల్యాన్ని తగ్గించడం కూడా వారి ప్రధానోద్దేశ్యాల్లో ఒక్కటి. తెలంగాణలో ఉప ఎన్నికలు వచ్చేనాటికి ప్రజల్లో కాంగ్రెసుపై ఉన్న వ్యతిరేకతను తగ్గించేలా ఆ యాత్ర ఉండాలని వారు భావిస్తున్నారు. కాంగ్రెసు, తెలుగుదేశం పార్టీలను తెలంగాణలో తిరగనివ్వమని తెలంగాణ రాజకీయ, ప్రజా సంఘాల జెఎసి హెచ్చరించిన నేపథ్యంలో వారు మెల్లగా పరిస్థితిని తమకు అనుకూలంగా మలుచుకోవడానికి తెలంగాణ పార్లమెంటు సభ్యులు ప్రయత్నిస్తున్నారు.