జగన్ ను అడ్డుకుని తీరుతాం: ఎర్రబెల్లి

హైదరాబాద్: తెలంగాణలో కాంగ్రెసు కడప పార్లమెంటు సభ్యుడు వైయస్ జగన్ పర్యటనను అడ్డుకోవాలని తమ నిర్ణయంలో ఎలాంటి మార్పు లేదని తెలుగుదేశం పార్టీ నాయకుడు ఎర్రబెల్లి దయాకర్ రావు అన్నారు. జగన్ పర్యటనను అడ్డుకుని తీరుతామని ఆయన సోమవారం మీడియా ప్రతినిధులతో అన్నారు. జగన్ తండ్రి, మాజీ ముఖ్యమంత్రి వైయస్ రాజశేఖర రెడ్డి వల్ల వరంగల్ జిల్లా ఎండిపోయిందని, దానివల్ల జగన్ వరంగల్లో పర్యటిస్తే ప్రజలు సహించరని ఆయన అన్నారు.

రాజకీయ నేతల పర్యటనలను అడ్డుకోవడం ప్రజాస్వామికమేనని ఆయన అన్నారు. తమ పార్టీ పార్లమెంటు సభ్యుడు హరికృష్ణ వ్యాఖ్యలపై ఆయన స్పందించారు. ఈ విషయంపై తాను హరికృష్ణతో మాట్లాడుతానని, స్థానిక పరిస్థితులను వివరిస్తానని ఆయన చెప్పారు. జగన్ పర్యటనను అడ్డుకుంటామని ఎర్రబెల్లి ఇంతకు ముందు చేసిన ప్రకటనను హరికృష్ణ వ్యతిరేకించారు. ఎర్రబెల్లి ప్రకటనను వ్యతిరేకిస్తూ ఆయన ఓ లేఖ రాశారు.