కెసిఆర్ విజయవాడ పర్యటన చిచ్చు

హైదరాబాద్: విజయవాడలో ఈ నెల 29వ తేదీన జరిగే జై ఆంధ్ర మహాసభకు హాజరు కావాలనే తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నిర్ణయం ఆంధ్ర ప్రాంతంలో చిచ్చు రేపింది. మహాసభకు రావాలని ప్రముఖ రచయిత, దళిత నేత కత్తి పద్మారావు చేసిన విజ్ఞప్తికి కెసిఆర్ సానుకూలంగా ప్రతిస్పందించారు. దీంతో ఆంధ్ర ప్రాంతంలో తీవ్ర గందరగోళం నెలకొంది. తెలంగాణలో పర్యటించడానికి సమైక్యాంధ్రవాదులకు హక్కుందని, దేశంలో ఎవరు ఎక్కడైనా పర్యటించవచ్చునని చేస్తున్న వాదనలను తిప్పికొట్టేందుకు ఆయన ఈ అవకాశాన్ని కెసిఆర్ వినియోగించుకుంటున్నట్లు కనిపిస్తోంది.

తెలంగాణలో కాంగ్రెసు పార్లమెంటు సభ్యుడు వైయస్ జగన్ పర్యటన తలపెట్టడం, తెలంగాణలో తెలుగుదేశం పార్టీ అధ్యక్షుడు నారా చంద్రబాబు నాయుడు పర్యటనకు ఏర్పాట్లు చేసుకుంటున్న సమయంలో కెసిఆర్ నిర్ణయం చాలా మందికి మింగుడు పడడం లేదు. తెలంగాణలో పర్యటించడానికి ఏ విధమైన హక్కు ఉందో ఆంధ్ర ప్రాంతంలో పర్యటించడానికి తనకే హక్కుందని చెప్పడానికి కెసిఆర్ సిద్ధపడుతున్నారు.

కెసిఆర్ నిర్ణయం ముఖ్యమంత్రి కె రోశయ్యను కూడా ఇరకాటంలో పెట్టే పరిస్థితి ఉంది. తెలంగాణలో తెలంగాణవాదుల సభలకు, కార్యక్రమాలకు ప్రభుత్వం అనుమతి ఇవ్వడం లేదు. జగన్ వంటి సమైక్యవాదులు తెలంగాణలో పర్యటించడానికి మాత్రం అనుమతి లభిస్తోంది. ఈ స్థితిలో తన ఆంధ్ర పర్యటనకు ప్రభుత్వం అనుమతి ఇస్తుందా, లేదా అనే పరీక్షను రోశయ్యకు కెసిఆర్ పెట్టబోతున్నారు. జై ఆంధ్ర ఉద్యమానికి చేయూత ఇవ్వడానికి, ఇరు ప్రాంతాల వారు రాష్ట్ర విభజనకు కలిసికట్టుగా పోరాటం చేయడానికి కూడా ఈ పర్యటన ఉపయోగపడుతోందని భావిస్తున్నారు. తద్వారా, కోస్తాంధ్రలోని కొద్ది మంది పెట్టుబడిదారులు, వ్యాపారులు మాత్రమే తెలంగాణ రాష్ట్ర ఏర్పాటును వ్యతిరేకిస్తున్నారని ఆయన చాటదలుచుకున్నట్లు కనిపిస్తోంది.

మొత్తం మీద, కెసిఆర్ విజయవాడ పర్యటన సీమాంధ్ర నేతలకు గుబులు రేపుతోంది. విజయవాడకు రావడానికి కెసిఆర్ కు ఏ విధమైన అంభ్యతరం లేదని చెబుతూనే ఆంధ్ర సంస్థల నాయకులు ఆయనకు సవాళ్లు విసురుతున్నారు. సమైక్యవాదులను తెలంగాణలో అనుమతిస్తామని ప్రకటించి విజయవాడకు రావాలని అంటున్నారు. అయితే, తమకు ఏ విధమైన అభ్యంతరం లేదని, తెలంగాణవాదులు మాత్రమే అడ్డుకుంటున్నారని కెసిఆర్ చెప్పే అవకాశం ఉందని అంటున్నారు. తెలంగాణలో సీమాంధ్ర నాయకులు ఎలా పర్యటిస్తున్నారో, ఆంధ్రలో తాను పర్యటిస్తానని కెసిఆర్ సవాల్ విసురుతున్నట్లే భావించాలి.