సిఎం రోశయ్య కోసం భారీ భద్రతా ఏర్పాట్లు

పటాన్‌ చెరు: తీవ్రవాదుల నుంచి తీవ్ర ముప్పు పొంచి ఉందన్న సమాచారంతో ముఖ్యమంత్రి మెదక్ జిల్లా పర్యటనకు జిల్లా అధికారులు భారీ భద్రతా ఏర్పాట్ల్లు చేస్తున్నారు. పటాన్‌చెరు, రామచంద్రాపురంలో ఈ నెల 23న ముఖ్యమంత్రి రోశయ్య పర్యటన దృష్ట్యా భారీ ఏర్పాట్లు చేస్తున్నారు. ఏర్పాట్లను కలెక్టర్‌ సురేశ్‌కుమార్‌ స్వయంగా పరిశీలించారు. సీఎం పర్యటించే ప్రాంతాల్లో కలెక్టర్‌తోపాటు అధికార బృందం ట్రయల్‌రన్‌ నిర్వహించింది. తొలుత అభివృద్ధి పనులకు శంకుస్థానలు చేసే లింగంపల్లి చౌరస్తాను కలెక్టర్‌ సురేశ్‌కుమార్‌తోపాటు ఎమ్మెల్సీ భూపాల్‌రెడ్డి, ఎమ్మెల్యే నందీశ్వర్‌గౌడ్‌, జీహెచ్‌ఎంసీ జోనల్‌ కమిషనర్‌ వెంకట్‌రాంరెడ్డి పరిశీలించారు. ముఖ్యమంత్రి సందర్శించనున్న పటాన్‌చెరులోని రేణుక ఎల్లమ్మ దేవాలయాన్ని, ఇక్కడే జరిగే బహిరంగ సభ స్థలాన్ని వారు పరిశీలించారు.

అనంతరం రామచంద్రాపురంలో వివిధ శాఖల అధికారులతో కలెక్టర్‌ సమావేశమయ్యారు. ఈ సందర్భంగా కలెక్టర్‌ సురేశ్‌కుమార్‌ విలేకరులతో మాట్లాడుతూ ముఖ్యమంత్రి రోశయ్య పర్యటన వివరాలను తెలిపారు. లింగంపల్లి చౌరస్తా నుంచి నక్కవాగు వరకు జాతీయరహదారిపై ఏర్పాటు చేసిన బటర్‌ఫ్లై లైట్లను ప్రారంభిస్తారని చెప్పారు. అలాగే 24 కాలుష్య పీడిత గ్రామాలకు రూ. నాలుగు కోట్ల వ్యయంతో నూతనంగా నిర్మించే మంచినీటి పైప్‌లైన్‌ పనులను ప్రారంభిస్తారని, జిన్నారం ఊట్ల గ్రామంలోని డంపింగ్‌యార్డును పంచాయతీరాజ్‌ వారికి అప్పగిస్తారని తెలిపారు.