28 నుంచి జగన్ తెలంగాణ యాత్ర

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ తెలంగాణ జిల్లా పర్యటన ఖరారైంది. ఆయన ఓదార్పు యాత్ర వరంగల్ జిల్లాలో ఈ నెల 28వ తేదీ నుంచి ఐదు రోజుప పాటు సాగుతుంది. జిల్లాలోని 11 శాసనసభా నియోజకవర్గాల్లోని 33 మండలాల్లో ఆయన పర్యటిస్తారు. వైయస్ రాజశేఖర రెడ్డి ఆకస్మిక మరణాన్ని తట్టుకోలేక మృతి చెందినవారి కుటుంబాలను ఆయన పరామర్శిస్తారు.

మహబూబాబాద్ నియోజకవర్గంలోని నందమూరినగర్ లో ఆయన యాత్ర ప్రారంభమవుతుంది. మొత్తం 72 గ్రామాల్లో పర్యటిస్తారు. ఆయన ఓదార్పు యాత్ర జనగామ నియోజకవర్గంలోని బచ్చన్నపేట మండలం పోచన్నపేటలో ముగుస్తుంది. హైదరాబాదులోని భారీ నీటి పారుదల శాఖ మంత్రి పొన్నాల లక్ష్మయ్య నివాసంలో వరంగల్ జిల్లా నాయకులు సమావేశమై జగన్ ఓదార్పు యాత్ర ఏర్పాట్లను సమీక్షిస్తారు.