తుఫానుతో తీర ప్రాంత జిల్లాలు అస్తవ్యస్తం

హైదరాబాద్‌: లైలా తుఫాను ప్రభావం తీర ప్రాంత జిల్లాలపై తీవ్రంగా పడుతోంది. కోస్తాంధ్రలోని నెల్లూరు, గుంటూరు, కృష్ణా తదితర జిల్లాల్లో ఎడతెరిపి లేకుండా వర్షాలు కురుస్తున్నాయి. కొన్ని చోట్ల పరిస్థితి భయంకరంగా ఉంది. తుఫాను తీరం దాటిన బాపట్ల పరిసర ప్రాంతాలన్నీ అంధకారంలో మగ్గుతున్నాయి. సముద్రంలో ఐదు సెంటి మీటర్ల మేర అలలు ఎగిసి పడుతున్నాయి. విశాఖ జిల్లాలో ఈదురు గాలులతో కూడిన భారీ పర్షం కురుస్తోంది. ప్రకాశం జిల్లా ఒంగోలు పట్టణం పుర్తిగా నీట మునిగింది. ఒంగోలులో 34 సెంటీమీటర్ల వర్షపాతం నమోదైంది.

భారీ వర్షాలకు నెల్లూరు జిల్లాలో ముగ్దురు మరణించారు. గుంటూరు, ప్రకాశం జిల్లాల్లో కుంభవృష్టి కురుస్తోంది. కృష్ణా జిల్లాలో ముగ్గురు గల్లంతైనట్లు తెలుస్తోంది. బాపట్లలో 32 సెంటీమీటర్ల వర్షపాతం నమోదైంది. అయితే తుఫాను క్రమంగా బలహీనపడుతోంది. సహాయక చర్యల్లో పాల్గొనాలని ముఖ్యమంత్రి కె. రోశయ్య ప్రతిపక్షాలను కోరారు. 31 వేల మంది బాధితులను పునరావాస కేంద్రాలకు తరలించినట్లు ఆయన తెలిపారు.