చీకట్లో నెల్లూరు: మచిలీపట్నం జలమయం

విజయవాడ: నెల్లూరు జిల్లాలో భారీగా వర్షాలు పడుతున్నాయి. లైలా తుఫాను నెల్లూరుకు ఈశాన్య దిశగా 120 కిలోమీటర్ల దూరంలో లైలా తుపాను నెలకొని ఉంది. తుపాను ధాటికి విద్యుత్తు వ్యవస్థ పూర్తిగా దెబ్బతింది. నెల్లూరుతో పాటు తీర ప్రాంతంలోని మండలాల్లో విద్యుత్తు సరఫరా నిలిచిపోయింది. తీర ప్రాంతంలోని ప్రజలకు వైద్య సేవలందించేందుకు 20 ప్రత్యేక బృందాలను ఏర్పాటు చేశారు. నెల్లూరులో పలు కార్యక్రమాలు రద్దయ్యాయి.

కృష్ణా జిల్లాలోని మచిలీపట్నం జలమయమైంది. బుధవారం నుంచి ఎడతెరిపి లేకుండా కురుస్తున్న భారీ వర్షానికి కృష్ణాజిల్లాలోని లోతట్టు ప్రాంతాలు నీట మునిగాయి. 18 మండలాల్లోని 233 గ్రామాలను అధికారులు అప్రమత్తం చేశారు. తీర ప్రాంతంలో ఉన్న ఆరు మండలాలోని దాదాపు మూడు వేలమందిని పునరావాస కేంద్రాలకు తరలించారు. తుపాను ప్రభావిత మండలాల్లో ప్రజలను తరలించేందుకు ప్రత్యేకంగా 40 బస్సులను అధికారులు సిద్ధం చేశారు.