జగన్ ను అడ్డుకుంటాం: కోదండరామ్

హైదరాబాద్: తెలంగాణలో తలపెట్టిన ఓదార్పు యాత్రను జగన్ ఉపసంహరించుకోవాలని, లేదంటే దాన్ని అడ్డుకుంటామని తెలంగాణ జేఏసీ కన్వీనర్ కోదండరామ్ అన్నారు. వరంగల్ జిల్లాలో జగన్ తలపెట్టిన ఓదార్పు యాత్ర, భవిష్యత్ కార్యచరణపైన తెలంగాణ జేఏసీ నేతలు కమిటీ ప్రధాన కార్యాలయంలో సమావేశమై చర్చించారు. అనంతరం గన్‌పార్క్ వద్దకు వెళ్లారు. జగన్ యాత్ర వద్దని ఆత్మహత్య చేసుకున్న రాజ్‌కుమార్‌కు నివాళులర్పించారు. ఈ సందర్భంగా జేఏసీ చైర్మన్ కోదండరాం మీడియా ప్రతినిధులతో మాట్లాడారు.

సమైక్యవాద రాజకీయాలను కోసమే జగన్ తెలంగాణలో యాత్ర చేస్తున్నారనేది తమ అభిప్రాయమన్నారు. కేసీఆర్ విజయవాడ వెళ్తున్నప్పుడు జగన్ యాత్రను అడ్డుకోవడం ఎంతవరకు సరైనదని ప్రశ్నించగా, కేసీఆర్ విజయవాడ ఎందుకు వెళ్తున్నారనే వివరాలు తెలియలేదని, తెలుసుకున్న తర్వాత దానిపై చర్చిస్తామని జవాబిచ్చారు.