గుంటూరు జిల్లాలో భారీ వర్షాలు

గుంటూరు: లైలా తుఫాను ప్రభావంతో గుంటూరు జిల్లాలో విస్తారంగా వర్షాలు కురుస్తున్నాయి. వర్షాలతో జిల్లాలో జనజీవనం స్తంభించింది. రేపల్లె, బాపట్ల, నిజాంపట్నం తదితర ప్రాంతాల్లో ఈదురు గాలులతో కూడిన వర్షాలు పడుతున్నాయి. దీంతో చెట్లు, విద్యుత్ స్తంభాలు కూలిపోయాయి. విద్యుత్ సరఫరాకు అంతరాయం ఏర్పడింది.

నిజాంపట్నం, సూర్యలంక వంటి తీర ప్రాంతాల్లో సముద్రంలో భారీగా అలలు ఎగిసిపడుతున్నాయి. ఈపురుపాలెం మండలం ఉప్పర పాలెంలో చెరువుకు గండి పడింది. దీంతో చేపలు కొట్టుకుపోయాయి. రైళ్ల రాకపోకలకు కూడా అంతరాయం ఏర్పడింది. భారీగా పంటలు నష్టపోయాయి.