వైయస్ జగన్ పై హైకమాండ్ చర్య తీసుకుంటుందా?

హైదరాబాద్: వైయస్ జగన్ వరంగల్ జిల్లా ఓదార్పు యాత్రను విరమించుకోకపోతే ఏమవుతుందనే విషయం ఇప్పుడు ఆసక్తిగా మారింది. ప్రస్తుత స్థితిని బట్టి చూస్తే జగన్ ఓదార్పు యాత్రను వాయిదా వేసుకునే స్థితిలో లేనట్లే కనిపిస్తోంది. అయితే, జగన్ యాత్రను ఆపించే ప్రయత్నాలు కొనసాగుతున్నట్లు తెలుస్తోంది. ప్రభుత్వ రాయబారిగా యాత్రను ఆపించడానికి మంత్రులు సబితా ఇంద్రా రెడ్డి, ఎన్ రఘువీరా రెడ్డి వైయస్ జగన్ వద్దకు వెళ్లినట్లు తెలుస్తోంది. జగన్ కు వారు నచ్చజెప్పే ప్రయత్నాలు చేస్తున్నట్లు సమాచారం.

అయితే జగన్ దిగిరాకపోతే కాంగ్రెసు పార్టీ అధిష్టానం చర్యలు తీసుకుంటుందా అనేది చర్చనీయంగా మారింది. జగన్ పై చర్యలు తీసుకోవడం కాంగ్రెసు అధిష్టానానికి అంత సులభం కాలేదని అంటున్నారు. జగన్ తన యాత్రను విరమించుకోవాలని పార్టీ అధిష్టానం ఎక్కడా జగన్ కు అధికారికంగా సూచించలేదు. జగన్ యాత్రపై పార్టీ అధిష్టానం ఏ విధమైన సంకేతాలు రాలేదని సాక్షి దినపత్రిక ఓ వార్తాకథనాన్ని ప్రసారం చేసింది. జగన్ యాత్రకు ఆటంకాలు లేవని మొయిలీ చెప్పకనే చెప్పారని సాక్షి టీవీ చానెల్ లో ఓ వార్తాకథనం ప్రసారమైంది.