చిరంజీవిని ఢిల్లీకి పిలిచిన సోనియా: వైయస్ జగన్ కు చెక్

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ ధిక్కార స్వరం వినిపిస్తున్న నేపథ్యంలో కాంగ్రెసు అధిష్టానం చిరంజీవికి ఆహ్వానం పలుకుతోంది. కాంగ్రెసు అధ్యక్షురాలు సోనియా గాంధీ చిరంజీవిని ఢిల్లీకి ఆహ్వానించారు. ఆయన ఈ నెల 29వ తేదీన చిరంజీవి ఢిల్లీ వెళ్లనున్నారు. రాజ్యసభ ఎన్నికల్లో సహకారం కోసం చిరంజీవిని ఢిల్లీకి పిలిచినట్లు చెబుతున్నారు. రాజ్యసభ ఎన్నికల్లో తాము పోటీ చేస్తామని చిరంజీవి ప్రకటించారు. ఒక్క సీటు గెలుచుకోవడానికి ప్రజారాజ్యం పార్టీకి కాంగ్రెసు మద్దతు అవసరమవుతుంది. లేదా మరో సీటును దక్కించుకోవాలంటే కాంగ్రెసుకు ప్రజారాజ్యం మద్దతు అవసరమవుతుంది. ఈ స్థితిలో పరస్పర సహకారం కోసం చిరంజీవిని సోనియా ఢిల్లీకి అహ్వానించినట్లు చెబుతున్నారు.

అయితే వైయస్ జగన్ వ్యవహార శైలితో విసిగిపోయిన సోనియా చిరంజీవితో భవిష్యత్తు రాజకీయ వ్యూహరచన చేయాలనే ఉద్దేశంతో ఉన్నట్లు తెలుస్తోంది. పార్టీకి ప్రజాకర్షణ గల నాయకుడి అవసరం ఉన్నందున చిరంజీవికి గాలం వేసే ఉద్దేశంతో కాంగ్రెసు పార్టీ ఉంది. ఇప్పటికే కొంత మేరకు చిరంజీవితో చర్చలు జరిగినట్లు చెబుతున్నారు. చాలా కాలంగా చిరంజీవి కాంగ్రెసుకు అనుకూలంగా వ్యవహరిస్తన్న విషయం కూడా తెలిసిందే.