వంగపల్లిలోనే ఇంటర్ సిటీ: ఏ క్షణమైనా జగన్ అరెస్టు?

హైదరాబాద్: వరంగల్ జిల్లాలో ఓదార్పు యాత్రకు చేపట్టేందుకు బయలుదేరిన కడప పార్లమెంటు సభ్యుడు వైయస్ జగన్ ను ఏ క్షణంలోనైనా పోలీసులు అరెస్టు చేసే అవకాశం ఉంది. జగన్ ప్రయాణిస్తున్న ఇంటర్ సిటీ ఎక్స్ ప్రెస్సు రైలు శుక్రవారం ఉదయం పది గంటల నుంచి నల్లగొండ జిల్లా వంగపల్లిలోనే ఆగిపోయింది. ఇంటర్ సిటీలో 300 మందికి పైగా పోలీసులు ఉన్నారు. జగన్ భద్రతకు పెద్ద యెత్తున పోలీసులను నియోగించారు. పరిస్థితిని ఊహించిన పోలీసులు ఇంటర్ సిటీకి ముందు ఓ పైలట్ రైలును ఉంచారు. దానిలో పోలీసులు ఉన్నారు.

పైలట్ రైలు నల్లగొండ జిల్లా ఆలేరుకు సమీపంలో నిలిచిపోయింది. ఇది కదిలితే తప్ప ఇంటర్ సిటీ ముందుకు సాగే పరిస్థితి లేదు. దీంతో జగన్ ముందుకు కదలలేని స్థితి ఉంది. వరంగల్ జిల్లాలోనూ మహబూబాబాద్ రైల్వే స్టేషనులో నెలకొన్న ఉద్రిక్త వాతావరణం దృష్ట్యా జగన్ ను పోలీసులు అదుపులోకి తీసుకునే అవకాశాలే ఎక్కువగా ఉన్నాయి. మహబూబా బాద్ రైల్వే స్టేషనులో జగన్ కు స్వాగతం చెప్పడానికి వచ్చిన కాంగ్రెసు నాయకులను పోలీసులు వెనక్కి పంపించేశారు.