బాబును ముఖ్యమంత్రిని చేద్దాం: జూ.ఎన్టీఆర్

హైదరాబాద్: ఎన్నికల్లో తెలుగుదేశం పార్టీని గెలిపించి, ఆ అధ్యక్షుడు నారా చంద్రబాబునాయుడిని ముఖ్యమంత్రిని చేద్దామని సినీ నటుడు జూనియర్ ఎన్టీఆర్ పార్టీ శ్రేణులకు పిలుపునిచ్చారు. ఆయన శనివారం మహానాడులో ప్రసంగించారు. తన ఆఖరు రక్తం బొట్టు ఉన్నంత వరకు పార్టీ కోసం, రాష్ట్రాభివృద్ధి కోసం పని చేస్తానని ఆయన అన్నారు. ఈ విషయంలో తన ప్రాణాలను కూడా లెక్క చేయనని ఆయన అన్నారు. పార్టీలో యువతకు, మహిళలకు ప్రాధాన్యం ఇవ్వాలని ఆయన చంద్రబాబును కోరారు.

రాష్ట్రంలో ఎన్నికలు ఎప్పుడైనా రావచ్చునని, వాటిని ఎదుర్కోవడానికి పార్టీ శ్రేణులు సిద్దంగా ఉండాలని ఆయన అన్నారు. రాష్ట్రంలో అసమర్థ పాలన జరుగుతోందని ఆయన అన్నారు. తెలుగుదేశం పార్టీ స్వర్గీయ ఎన్టీరామారావు ఒక్కడితోనే ప్రారంభమైందని, చినుకు చినుకు కలిసే సముద్రమవుతుందని, ఇప్పుడు కార్యకర్తలతో పార్టీ బలం పుంజుకుందని ఆయన అన్నారు.