తెలంగాణ ఏమైనా పాకిస్తానా: లగడపాటి

హైదరాబాదు: తెలంగాణ ఏమైనా పాకిస్తానా, అఫ్గనిస్తానా, తాలిబన్లు రాజ్యమేలుతున్నారా అని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ప్రశ్నించారు. తమ పార్టీ పార్లమెంటు సభ్యుడు వైయస్ జగన్ ఓదార్పు యాత్రను అడ్డుకోవడంపై ఆయన శుక్రవారం సాయంత్రం మీడియా ప్రతినిధుల సమావేశంలో తీవ్రంగా మండిపడ్డారు. కెసిఆర్ ఓ నాగుపాము అని, అది కాటేసిందని తాము తాము కాటేయబోమని ఆయన అన్నారు. ఇది ప్రజాస్వామ్యమని, ఎవరు ఎక్కడికైనా వెళ్లవచ్చునని ఆయన అన్నారు. వ్యక్తి స్వేచ్ఛను తెరాస అధ్యక్షుడు కెసిఆర్, ఆయన కుటుంబ సభ్యులు కాలరాస్తున్నారని లగడపాటి ధ్వజమెత్తారు.

వరంగల్ జిల్లా మహబూబాబాద్ విధ్వంసానికి కెసిఆర్ బాధ్యత వహించాలని ఆయన అన్నారు. ప్రజల ప్రాణాలతో చెలగాటమాడుతున్న కెసిఆర్ పై హత్య కేసు నమోదు చేయాలని ఆయన డిమాండ్ చేశారు. కెసిఆర్ ను అరెస్టు చేయాలని, తెరాస గుర్తింపును రద్దు చేయాలని కూడా ఆయన డిమాండ్ చేశారు. జగన్ యాత్ర వ్యక్తిగతమని, దాన్ని రాజకీయం చేసి రాజకీయ పబ్బం గడుపుకోవడానికి చూస్తున్నారని ఆయన అన్నారు.