పెద్దాపురంలో పెద్ద వ్యభిచార నిర్వాహకుల అరెస్టు

పెద్దాపురం: పెద్ద పల్లెటూరులోనూ హైటెక్ వ్యభిచారం నిర్వహిస్తున్నారు. స్థానిక దర్గానగర్‌ పరిసర ప్రాంతంలో నివాసం ఉంటూ సెల్‌ ఫోన్‌ ల ద్వారా హైటెక్‌ వ్యభిచారం నిర్వహిస్తున్న ముఠాను శనివారం పోలీసులు అరెస్టు చేశారు. స్థానిక పోలీసు స్టేషన్‌ ఏర్పాటుచేసిన సమావేశంలో డీఎస్పీ చందు హర్షవర్ధనరావు ఇందుకు సంబంధించిన వివరాలు వెల్లడించారు. వ్యభిచార నిర్వహణ, ఇతర ప్రాంతాలకు తరలింపునకు సంబంధించి పుల్లా వీరవెంకటలక్ష్మి, ఆమె కూతురు శివజ్యోతి అలియాస్‌ చాందిని, బెజవాడ లక్ష్మి బ్రోకర్లు ఆచంట వీరబాబు, దూళ్ల వీరబాబులను అరెస్టుచేసి కోర్టులో హాజరు పర్చినట్టు తెలిపారు.

నిందితుల నుంచి స్వాధీనం చేసుకున్న రెండు సెల్‌ ఫోన్లను సీజ్‌ చేసినట్టు తెలిపారు. అమ్మాయిల అక్రమ రవాణా, బలహీనతలను ఆసరాగా తీసుకుని వ్యభిచార రొంపిలోకి దించే వ్యక్తులపై చర్యలు తప్పవని ఆయన హెచ్చరించారు. ఈ సమావేశంలో సీఐ ఎం. వెంకటేశ్వరరావు, ఎస్సైలు పుల్లారావు, జి. సత్యనారాయణ పాల్గొన్నారు.