తెలంగాణ ద్రోహి చిరంజీవితో స్నేహం వద్దు: జీవన్ రెడ్డి

హైదరాబాద్: చిరంజీవి నాయకత్వంలోని ప్రజారాజ్యంతో కాంగ్రెసు పొత్తు ప్రయత్నాలను కాంగ్రెసు తెలంగాణ సీనియర్ నాయకుడు టి. జీవన్ రెడ్డి వ్యతిరేకించారు. తెలంగాణ వ్యతిరేకి, ద్రోహి చిరంజీవితో స్నేహం చేయడం కాంగ్రెసుకు తగదని ఆయన సోమవారం మీడియా ప్రతినిధులతో అన్నారు. చిరంజీవితో పొత్తు పెట్టుకోవాలని ఆలోచనను కాంగ్రెసు అధిష్టానం పునసమీక్షించాలని ఆయన కాంగ్రెసు అధిష్టానాన్ని కోరారు. చిరంజీవిని కాంగ్రెసుకు చేరువ చేయడం సమైక్యవాదుల కుట్ర అని ఆయన అన్నారు.

తెలంగాణ వ్యతిరేకి అయిన చిరంజీవితో కాంగ్రెసు పొత్తు వల్ల తెలంగాణ ప్రజల మనోభావాలు దెబ్బ తింటాయని, ప్రజల్లోకి తప్పుడు సంకేతాలు వెళ్తాయని ఆయన అన్నారు. కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ చేసిన ప్రకటనను బట్టి చిరంజీవి కాంగ్రెసుకు చేరువ కావడం సమైక్యవాదుల కుట్ర అనే విషయం తెలిసిపోతోందని ఆయన అన్నారు. తెలంగాణకు అనుకూలంగా ఉన్న పార్టీలతోనే కాంగ్రెసు పార్టీ స్నేహం చేయాలని ఆయన సూచించారు.