రాజ్యసభ అభ్యర్థులను ఎంపిక చేయలేదు: వీరప్ప మొయిలీ

న్యూఢిల్లీ: రాజ్యసభకు రాష్ట్రం నుంచి జరిగే ఎన్నికలకు పార్టీ అభ్యర్థులను ఎంపిక చేసినట్లు వచ్చిన వార్తల్లో నిజం లేదని కాంగ్రెసు ఆంధ్రప్రదేశ్ వ్యవహారాల ఇంచార్జీ, కేంద్ర మంత్రి వీరప్ప మొయిలీ స్పష్టం చేశారు. తనకు టికెట్ ఇవ్వడం లేదని వార్తలు వచ్చిన నేపథ్యంలో వార్త దినపత్రిక యజమాని గిరీష్ సంఘీ సోమవారం ఉదయం మొయిలీని కలిశారు. ఈ సందర్భంగా మొయిలీ మీడియాతో మాట్లాడారు. రాజ్యసభకు అభ్యర్థులను ఖరారు చేసినట్లు వచ్చిన వార్తలు ఉత్తి ప్రచారాలేనని ఆయన అన్నారు.

రాజ్యసభ ఎన్నికలకు తమ పార్టీ అభ్యర్థుల పేర్లను ఒకటి రెండు రోజుల్లో విడుదల చేస్తామని ఆయన చెప్పారు. ఆరుగురు కాంగ్రెసు నేతల రాజ్యసభ పదవీ కాలం ముగుస్తుండగా నలుగురు మాత్రమే రాజ్యసభకు గెలిచే అవకాశం ఉంది. దీంతో గిరీష్ సంఘీకి పార్టీ అధిష్టానం టికెట్ ఇవ్వడం లేదనే వార్తలు వచ్చాయి. కాగా, వి హనుమంతరావు, రేణుకా చౌదరి, జెడి శీలం, జైరాం రమేష్ లకు టికెట్లు ఇస్తున్నట్లు వార్తలు వచ్చాయి.