వైయస్ జగన్ కాంగ్రెసును వీడరు: వీరప్ప మొయిలీ

న్యూఢిల్లీ: కడప పార్లమెంటు సభ్యుడు వైయస్ జగన్ కాంగ్రెసు పార్టీలోనే ఉన్నారని కాంగ్రెసు ఆంధ్రప్రదేశ్ వ్యవహారాల ఇంచార్జీ, కేంద్ర మంత్రి వీరప్ప మొయిలీ అన్నారు. దివంగత నేత వైయస్ రాజశేఖర రెడ్డి కుమారుడైన జగన్ కాంగ్రెసు పార్టీని వీడరని ఆయన సోమవారం మీడియా ప్రతినిధుల సమావేశంలో అన్నారు. జగన్ యంగ్ అండ్ డైనమిక్ లీడర్ అని ఆయన కొనియాడారు. అయితే జగన్ పార్టీని వీడతారనే ప్రచారాన్ని మాత్రం ఆయన తేలిగ్గా తీసుకున్నారు.

రాష్ట్ర కాంగ్రెసులో చీలిక వస్తుందనే వార్తలను ఆయన ఖండించారు. పార్టీలో విభేదాలు లేవని, చీలిక రాదని ఆయన స్పష్టం చేశారు. అపోహల వల్లనే మీడియా వార్తలు వచ్చినట్లు ఆయన తెలిపారు. జగన్ కు చెక్ పెట్టేందుకు ప్రజారాజ్యం పార్టీ అధినేత చిరంజీవితో చేతులు కలిపినట్లు వస్తున్న వార్తలతో ఆయన ఏకీభవించలేదు. చిరంజీవితో రాజ్యసభ సీటుపై మాత్రమే చర్చించినట్లు ఆయన తెలిపారు.