కాంగ్రెసుతో పొత్తు చిరంజీవికి ఆత్మహత్యా సదృశ్యం: నారాయణ

హైదరాబాద్‌: కాంగ్రెసుతో చేతులు కలపాలనే ప్రజారాజ్యం పార్టీ అధ్యక్షుడు చిరంజీవి నిర్ణయాన్ని సిపిఐ కార్యదర్శి కె. నారాయణ వ్యతిరేకించారు. చిరంజీవికి అది ఆత్మహత్యా సదృశ్యమవుతుందని ఆయన మంగళవారం మీడియా ప్రతినిధులతో అన్నారు. కాంగ్రెసు, తెలుగుదేశం పార్టీలకు ప్రత్యామ్నాయంగా పని చేస్తామని చెప్పిన చిరంజీవి ఇప్పుడు కాంగ్రెసుతో చేతులు కలపాల్సిన అవసరం ఏం ఏర్పడిందని ఆయన ప్రశ్నించారు.

కాంగ్రెసు కుమ్ములాటలు రాష్ట్రాభివృద్ధికి ఆటంకంగా మారాయని నారాయణ ఆరోపించారు. సామాన్యులు బాధలను మంత్రులు పట్టించకోవడం లేదని ఆయన విమర్శించారు. మంత్రివర్గం, ప్రభుత్వ యంత్రాంగం పనిచేయకపోవడం వల్ల కింది స్థాయి ప్రభుత్వ సిబ్బంది కూడా పనిచేయడం లేదని ఆయన అన్నారు. జులై నుంచి ప్రత్యక్ష భూపోరాటాలకు దిగుతామని ఆయన చెప్పారు. తన ప్రభుత్వ హయాంలోనే రాష్ట్రాభివృద్ధి జరిగిందనే తెలుగుదేశం అధ్యక్షుడు నారా చంద్రబాబునాయుడు మాటలను ఆయన వ్యతిరేకించారు. చంద్రబాబు ప్రభుత్వ హయాంలో తాము ఆందోళనలు చేశామని, చంద్రబాబు హయాంలో అభివృద్ధి జరిగి ఉంటే తాము ఆందోళనలు చేసి ఉండేవారం కాదని, ఈ విషయంపై చర్చ జరుగుతుందని ఆయన అన్నారు.