శ్రీకాళహస్తి వరదరాజ స్వామి ఆలయం వద్ద సొరంగం

చిత్తూరు: చిత్తూరు జిల్లా శ్రీకాళహస్తిలో సొరంగ మార్గం బయటపడింది. శ్రీకాళహస్తి ప్రధానాలయానికి అనుబంధ ఆలయంగా ఉన్న వరదరాజస్వామి ఆలయం వద్ద ఈ సొరంగ మార్గం బయటపడింది. సొరంగంలో ఓ ఇనుపపెట్టే, పాత శాసనాలు బయటపడ్డాయి. పెట్టెలో ఆభరణాలు ఉంటాయని తొలుత భావించారు. అయితే అది ఖాళీగా ఉంది. ఇటీవల శ్రీకాళహస్తి రాజగోపురం కూలిపోవడంతో అధికారులు అనుబంధ ఆలయాలపై కూడా దృష్టి పెట్టారు. ఈ సమయంలో వరదరాజ స్వామి ఆలయం వద్ద ఆ సొరంగం బయటపడింది.

ఇనుప పెట్టెలో వరదరాజస్వామి విగ్రహాన్ని దాచి పెట్టేవారని భావిస్తున్నారు. అయితే, పెట్టెలోని ఆభరణాలను ఆగంతకులు దొంగిలించి ఉంటారనే అనుమానాలు కూడా వ్యక్తమవుతున్నాయి. అక్కడ గుప్త నిధుల కోసం వేట సాగిందని, అందులో భాగంగా పెట్టెలోని ఆభరణాలను ఎత్తుకుపోయి ఉంటారనే అభిప్రాయం కూడా వ్యక్తమవుతోంది.