కార్తికరెడ్డిపై చర్య తీసుకోకపోతే రాజీనామా: జయసుధ

హైదరాబాద్: గ్రేటర్ హైదరాబాద్ వార్డు కమిటీ ఎన్నికలు సికింద్రాబాద్ శాసనసభ్యురాలు జయసుధకు, మేయర్ కార్తిక రెడ్డికి మధ్య చిచ్చు పెట్టాయి. వీరిద్దరూ కాంగ్రెసు పార్టీకి చెందినవారే. కార్తిక రెడ్డిపై జయసుధ విరుచుకుపడ్డారు. కార్తిక రెడ్డిపై పార్టీ అధిష్టానానికి ఫిర్యాదు చేస్తానని ఆమె అన్నారు. తానో, ఆమెనో ఎవరో ఒకరం మాత్రమే ఉండాలని ఆమె సవాల్ చేసారు. తాను సూచించిన పేర్లను వార్డు కమిటీలకు ఎంపిక చేయకపోవడంపై జయసుధ కార్తిక రెడ్డిపై మండిపడ్డారు. తాను సూచించిన పేర్లు లేకపోతే రాజీనామా చేస్తానని ఆమె అన్నారు.

గ్రేటర్ హైదరాబాద్ నగర పాలక సంస్థ ఎన్నికల్లో మేయర్ కార్తిక రెడ్డి భర్త చంద్రారెడ్డి జోక్యం చేసుకుంటున్నారని జయసుధ ఆరోపించారు. కాగా, కాంగ్రెసు, మజ్లీస్ పార్టీలు కుమ్మక్కయి వార్డు కమిటీలను పంచుకుంటున్నాయని, తమకు ప్రాధాన్యం ఇవ్వడం లేదని తెలుగుదేశం, బిజెపి సభ్యులు కౌన్సిల్ సమావేశంలో గందరగోళం సృష్టించారు. సమావేశం నుంచి వాకౌట్ చేశారు.