వైయస్ జగన్ ది పార్టీ అంతర్గత వ్యవహారం: డి. శ్రీనివాస్

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ విషయం పార్టీ అంతర్గత వ్యవహారమని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ అన్నారు. కాంగ్రెసు రాజ్యసభ అభ్యర్థులు జైరాం రమేష్, జెడి శీలం, వి హనుమంతరావు, నేదురమల్లి జనార్దన్ రెడ్డి శాసనసభ ఆవరణలో నామినేషన్లు దాఖలు చేసిన కార్యక్రమానికి ఆయన శుక్రవారం హాజరయ్యారు. ఈ సందర్భంగా ఆయన మీడియా ప్రతినిధులతో మాట్లాడారు. హనుమంతరావుకు తిరిగి రాజ్యసభ సీటు దక్కినందుకు ఆనందంగా ఉందని ఆయన చెప్పారు.

తనకు రాజ్యసభ సీటు రాలేదన్న బాధ లేదని ఆయన చెప్పారు. తాను రాజ్యసభ సీటు అడగలేదని, అందువల్ల బాధపడే ప్రసక్తే ఉత్పన్నం కాదని ఆయన అన్నారు. మీరు ఊహించుకుని వార్తలు రాస్తే నేనేం చేయాలని ఆయన అడిగారు. రాజ్యసభకు ప్రాతినిధ్యం వహిస్తూ పదవీ కాలం ముగిసిన నలుగురు అప్పటికే ఉన్నారని, వారున్నప్పుడు తాను ఎలా టికెట్ అడుగుతానని ఆయన అన్నారు.