అద్దె ఇల్లు కూడా అదనంగా తీసుకున్న వైయస్ జగన్

హైదరాబాద్: సొంత ఇల్లు చాలక వైయస్ జగన్ పక్కనే ఉన్న ఒక ఇంటిని అద్దెకు తీసుకున్నారు. కడప ఎంపీ జగన్ ప్రస్తుతం సాగర్ సొసైటీలోని ఇంట్లో నివాసముంటున్న సంగతి తెలిసిందే. తల్లి విజయమ్మ, సోదరి షర్మిల, భార్య భారతి, మరికొందరు కుటుంబ సభ్యులతో శనివారం మధ్యాహ్నం 3 గంటల ప్రాంతంలో జగన్ కొత్త ఇంట్లో అడుగుపెట్టారు. వారు వచ్చేముందే ఇద్దరు వ్యక్తులు బైబిల్‌తో ఆ ఇంట్లోకి వెళ్లారు.

ఈ ఇల్లు టీడీపీ నుంచి రాజ్యసభ సీటు దక్కించుకున్న సుజనా చౌదరి నివాసం పక్కనే ఉంది. సోమవారం జగన్ కుటుంబ సభ్యులంతా అక్కడకు మారతారని, ప్రస్తుతం ఉంటున్న ఇల్లును కార్యాలయంగా వినియోగించుకుంటారని తెలిసింది. సందర్శకుల సంఖ్య ఒక్కోసారి ఎక్కువగా ఉండడం, వారంతా ప్రస్తుత ఇంట్లోని బెడ్‌ రూమ్‌ లలో వేచి ఉండడం కుటుంబ సభ్యులకు అసౌకర్యంగా మారిందని కొందరు తెలిపారు. దీనివల్లే కొత్త ఇల్లు అద్దెకు తీసుకున్నట్లు తెలిపారు. వాస్తు కూడా ఓ కారణం అయి ఉండొచ్చని కొందరంటున్నారు.