రోశయ్య, వైయస్ జగన్ ల మధ్య విభేదాలు లేవు: జెసి

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ కు, ముఖ్యమంత్రి కె. రోశయ్యకు మధ్య విభేదాలు లేవని కాంగ్రెసు సీనియర్ శాసనసభ్యుడు జెసి దివాకర్ రెడ్డి స్పష్టం చేశారు. విభేదాలున్నాయని ఎవడు చెప్పాడంటూ మీడియా ప్రతినిధులను ఎదురు ప్రశ్నించారు. జగన్, రోశయ్యనో చెప్పాలని ఆయన మరో ప్రశ్నకు సమాధానంగా అన్నారు.

మద్యం నియంత్రణకు ప్రభుత్వం కట్టుబడి ఉందని, అయితే ప్రజలు డిమాండ్ చేస్తుండడంతో మద్యం దుకాణాల వేలాన్ని పెద్ద యెత్తున నిర్వహిస్తున్నామని ఆయన చెప్పారు. ప్రజలు తాగడానికి సిద్ధపడ్డారని, ప్రభుత్వం ఈ విషయంలో ఏమీ చేయలేదని ఆయన అన్నారు. మద్యం టెండర్ల వేలం విషయంలో రోశయ్య ప్రభుత్వ వైఫల్యం లేదని ఆయన అన్నారు. మద్య నిషేధం ప్రపంచంలో ఎక్కడా ఆచరణ సాధ్యం కాలేదని ఆయన అన్నారు.