అసెంబ్లీ ఉప ఎన్నికలు: ఇరకాటంలో కాంగ్రెసు నేతలు

హైదరాబాద్: శాసనసభ ఉప ఎన్నికలు తెలంగాణ కాంగ్రెసు నాయకులకు తిప్పలు తెచ్చే పెట్టేట్లే ఉన్నాయి. తెలంగాణకు సానుకూలంగా ఉన్నామని అనిపించుకోవాల్సి వస్తుందనో, ప్రయోగం చేద్దామనో కాంగ్రెసు అధిష్టానం తెలంగాణలోని 12 శాసనసభ స్థానాలకు జరిగే ఉప ఎన్నికల్లో పోటీ చేయాలని నిర్ణయించింది. అయితే, ఇందులో ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పాత్ర ఎంత ఉందనేది అర్థం కావడం లేదు. కానీ ఆయన మాత్రం ఎక్కువగా నిందలు పడుతున్నారు. ఉప ఎన్నికల్లో పోటీ చేయవద్దని కాంగ్రెసు పార్లమెంటు సభ్యుడు మధు యాష్కీ, మాజీ మంత్రి టి. జీవన్ రెడ్డి వంటి వారు సూచించినా ఫలితం లేకపోయింది.

ఉప ఎన్నికల్లో కాంగ్రెసు పోటీ చేయకూడదనేది తన వ్యక్తిగతాభిప్రాయమని, అయితే పార్టీ అధిష్టానం నిర్ణయాన్ని తాము వ్యతిరేకించలేమని జీవన్ రెడ్డి అన్నారు. తన వ్యక్తిగతాభిప్రాయానికి కట్టుబడి తాను ఉప ఎన్నికల్లో పోటీ చేయకూడదని నిర్ణయించుకున్నట్లు ఆయన తెలిపారు. కాంగ్రెసు నాయకులను గ్రామాలకు రానివ్వబోమని, వారిని అడ్డుకుంటామని తెలంగాణవాదులు హెచ్చరిస్తున్నారు. ఈ స్థితిలో కాంగ్రెసు నాయకులు ఓట్లు వేయించుకోవడానికి అనుసరించే వ్యూహం ఏమిటనేది అర్థం కావడం లేదు.