తెలంగాణ ఉప ఎన్నికలు: పొత్తుతో చిరంజీవి లక్కీ

హైదరాబాద్: ప్రజారాజ్యం పార్టీ అధినేత చిరంజీవికి కాంగ్రెసుతో పొత్తు మరో విధంగా కలిసి వచ్చింది. సమైక్యాంధ్ర నినాదం తీసుకున్న కోస్తాంధ్రలో పర్యటనలు చేసిన చిరంజీవికి తెలంగాణలో అడుగు పెట్టడమే ఒక సమస్యగా మారింది. ఈ స్థితిలో తెలంగాణలో 12 శాసనసభా స్థానాలకు ఉప ఎన్నికలు ముంచుకొస్తున్నాయి. తెలంగాణలో కూడా తనకు అభిమానులు ఉన్నారని, తెలంగాణలో సమైక్యవాదులున్నారని చిరంజీవి ఇష్టం వచ్చినట్లు ప్రకటనలు చేస్తూ వచ్చారు. దీంతో తెలంగాణలో తన పార్టీ అభ్యర్థులను పోటీకి దించాల్సిన అగత్యం ఆయనకు ఉండేది. అయితే కాంగ్రెసుతో పొత్తు వల్ల ఈ గండం నుంచి చిరంజీవి గట్టెక్కారు.

కాంగ్రెసుతో పొత్తుకు సిద్ధపడిన చిరంజీవి పార్టీకి తెలంగాణలో జరిగే ఉప ఎన్నికల్లో పాల్గొనాల్సిన అవసరం లేకుండా పోయింది. ఉప ఎన్నికల్లో కాంగ్రెసుకు మద్దతు ప్రకటించి ఇంట్లో కూర్చున్నా ఆయనకు సరిపోతుంది. ఒక వేళ కాంగ్రెసు అనూహ్య ఫలితమేదైనా సాధిస్తే ఆ క్రెడిట్ లో కొంత కొట్టేయడానికి కూడా అవకాశం ఉంటుంది.