తెలంగాణ ఉప ఎన్నికలకు తెలుగుదేశం సై?

హైదరాబాద్: తెలంగాణలోని 12 శాసనసభ స్థానాలకు జరిగే ఉప ఎన్నికల్లో పోటీ చేయాలని కాంగ్రెసు పార్టీ నిర్ణయం తీసుకున్న నేపథ్యంలో తెలుగుదేశం పార్టీ కూడా పోటీకి సమాయత్తమవుతోంది. శ్రీకృష్ణ కమిటీ విధివిధానాలను వ్యతిరేకిస్తూ పది మంది తెలంగాణ రాష్ట్ర సమితి, ఒక బిజెపి, ఒక తెలుగుదేశం సభ్యులు రాజీనామా చేయడంతో ఆ స్థానాలకు ఉప ఎన్నికలు జరగనున్నాయి. రాజీనామా చేసిన సభ్యులను ఏకగ్రీవంగా ఎన్నుకోవాలని డిమాండ్ ను బేఖాతరు చేస్తూ కాంగ్రెసు పార్టీ పోటీకి సిద్ధపడుతోంది. దీంతో తెలుగుదేశం పార్టీ కూడా తన అభ్యర్థులను రంగంలోకి దింపే ఆలోచన చేస్తోంది.

కాగా, పోటీపై పార్టీలో భిన్నాభిప్రాయాలు వ్యక్తమవుతున్నాయి. పోటీ చేయకపోవడం వల్ల ప్రజల నుంచి సానుభూతి లభిస్తుందని, దాని వల్ల స్తానిక సంస్థల ఎన్నికల్లో లబ్ధి పొందవచ్చుననే వాదన తెలంగాణ నాయకుల నుంచి బలంగానే వినిపిస్తోంది. అయితే, సీమాంధ్ర నేతలు మాత్రం పోటీ చేయాలనే పట్టుపడుతున్నారు. పోటీ చేయకపోవడం తాము తెలంగాణకు అనుకూలమనే సంకేతాలు పంపినట్లు అవుతుందని వారు వాదిస్తున్నారు.