ఉప ఎన్నికలపై చంద్రబాబుతో విభేదించిన కడియం శ్రీహరి

వరంగల్: తెలంగాణలోని 12 శాసనసభా స్థానాలకు జరిగే ఉప ఎన్నికల్లో పోటీ చేయాలనే తెలుగుదేశం పార్టీ అధ్యక్షుడు నారా చంద్రబాబు నాయుడి నిర్ణయంపై అప్పుడే పార్టీలో లుకలుకలు ప్రారంభమయ్యాయి. ఈ విషయంలో పార్టీ సీనియర్ నాయకుడు కడియం శ్రీహరి చంద్రబాబుతో విభేదించారు. తెలంగాణ ఉప ఎన్నికల్లో పార్టీ పోటీ చేయకూడదని ఆయన బుధవారం మీడియా ప్రతినిధులతో అన్నారు. తెలంగాణకు కట్టుబడి ఉన్న తెలుగుదేశం పార్టీ తెలంగాణ కోసం రాజీనామా చేసినవారిపై పోటీకి దిగడం సరైంది కాదని ఆయన అన్నారు.

ప్రజల్లో తెలంగాణవాదం బలంగా ఉందని ఆయన అన్నారు. ఉప ఎన్నికలు తెలంగాణపై రెఫరెండం లాంటివని ఆయన అభిప్రాయపడ్డారు. చంద్రబాబు నిర్ణయాన్ని వ్యతిరేకిస్తూ మరింత మంది తెలుగుదేశం నాయకులు బయటకు రావచ్చుననే ప్రచారం జరుగుతోంది.