చిరంజీవితో కాంగ్రెసు పొత్తుపై నాగం జనార్దన్ రెడ్డి నిప్పులు

హైదరాబాద్: ప్రజారాజ్యం పార్టీతో కాంగ్రెసు పొత్తు పెట్టుకోవడంపై తెలుగుదేశం పార్టీ నాయకుడు నాగం జనార్దన్ రెడ్డి నిప్పులు చెరిగారు. సమైక్యవాది అయిన చిరంజీవితో కాంగ్రెసు పార్టీ ఎలా పొత్తు పెట్టుకుంటుందని ఆయన ప్రశ్నించారు. సమైక్యవాది చిరంజీవితో పొత్తు పెట్టుకున్న కాంగ్రెసును ఏమీ అనకుండా తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తమ పార్టీపై విమర్శలు చేయడాన్ని ఆయన తీవ్రంగా వ్యతిరేకించారు. కాంగ్రెసుతో తెరాస కుమ్మక్కయిందని ఆయన ఆరోపించారు. కాంగ్రెసు, తెరాసల మధ్య మ్యాచ్ ఫిక్సింగ్ జరిగిందని ఆయన వ్యాఖ్యానించారు.

తెలంగాణలోని 12 శాసనసభా స్థానాలకు జరిగే ఉప ఎన్నికల్లో కాంగ్రెసు పోటీ చేయకపోతే తాము కూడా చేయబోమని, పోటీ చేయకుండా కాంగ్రెసును కెసిఆర్ ఒప్పించాలని ఆయన అన్నారు. తెరాస శాసనసభ్యులతో కెసిఆర్ ఏకపక్షంగా రాజీనామాలు చేయించారని ఆయన వ్యాఖ్యానించారు. కెసిఆర్ స్వార్థ కోసం, రాజకీయ ప్రయోజనాల కోసం తెలంగాణవాదాన్ని వాడుకుంటున్నారని ఆయన విమర్శించారు. తెలంగాణకు ఎల్లవేళలా అన్యాయం చేస్తున్న కాంగ్రెసు పార్టీని వదిలేసి తమపై కెసిఆర్ విమర్శలు చేస్తున్నారని ఆయన అన్నారు.