జార్ఖండ్ రోడ్డు ప్రమాదంలో 21 మంది దుర్మరణం

ధన్ బాద్: జార్ఖండ్ లో ఘోర రోడ్డు ప్రమాదం జరిగింది. తాము ప్రయాణిస్తున్న బస్సు అదుపు తప్పి ధన్ బాద్ లోని గ్రాండ్ ట్రంక్ రోడ్డు వద్ద చెట్టుకు ఢీకొట్టడంతో పెళ్లి బృందానికి చెందిన 21 మంది మరణించారు. మరో 20 మంది గాయపడ్డారు. ఈ ప్రమాదం బుధవారం ఉదయం జరిగింది. పశ్చిమ బెంగాల్ లోని చిత్తరంజన్ పట్టణం నుంచి సాలంపూర్ కు ఈ బస్సు వస్తోంది.

డ్రైవర్ నియంత్రణ కోల్పోవడంతో బస్సు చెట్టుకు ఢీకొట్టింది. బస్సులో ప్రయాణిస్తున్నవారిలో 18 మంది అక్కడికక్కడే మరణించగా, మరో ముగ్గురు స్థానిక ఆస్పత్రిలో చికిత్స పొందుతూ మరణించినట్లు డిప్యూటీ పోలీసు సూపరింటిండెంట్ సంజయ్ రంజన్ చెప్పారు. బస్సు ప్రయాణికులు గోవింద్ పూర్ లోని ముండా బస్తీ పెళ్లికి వెళ్లి తిరిగి వస్తుండగా ప్రమాదం జరిగింది.