బాలయ్య, దాసరి జోడీ పొలిటికల్ టర్న్ అవుతుందా?

హైదరాబాద్: దర్శక రత్న దాసరి నారాయణ రావు, హీరో బాలకృష్ణ కాంబినేషన్ తెలుగు సమాజంలో రాజకీయ మలుపునకు కూడా కారణమవుతుందా అనే చర్చ ఊపందుకుంది. బాలయ్యతో దాసరి నారాయణ రావు సినిమా తీయాలని నిర్ణయించుకున్నప్పటి నుంచే ఈ చర్చ ప్రారంభమైంది. గురువారం బాలయ్య జన్మదినం సందర్భంగా దాసరి దర్శకత్వంలో పరమవీర చక్ర చిత్రం షూటింగ్ ప్రారంభం అయిన తీరు ఆ చర్చకు మరింత ఊపునిచ్చింది. తెలుగుదేశం పార్టీ అధ్యక్షుడు నారా చంద్రబాబు నాయుడు క్లాప్ కొట్టి చిత్రం షూటింగ్ ను ప్రారంభించారు. దాసరి నారాయణరావు బెబ్బులిపులి సినిమా ఎన్టీ రామారావుకు ఊపునిచ్చి రాజకీయ మలుపునకు కారణమైంది.

బాలయ్యతో తీస్తున్న పరమవీర చక్ర చిత్రం తనకు 150వ చిత్రం కావడాన్ని దాసరి నారాయణ రావు ప్రతిష్టాత్మకంగా తీసుకుంటున్నారు. రాజకీయంగా బాలయ్యకు ఓ మలుపును, ఊపునిచ్చే సినిమాగా దాన్ని తీయాలనేది ఆయన ఉద్దేశంగా కూడా కనిపిస్తుంది. కేంద్ర మంత్రి పదవి నుంచి తాను తప్పుకోవాల్సిన పరిస్థితి కాంగ్రెసు కల్పించడం ఆయనను తీవ్ర మనస్తాపానికి గురి చేసినట్లు భావిస్తున్నారు. ప్రజారాజ్యం అధినేత చిరంజీవి కాంగ్రెసు పార్టీకి దగ్గర కావడం కూడా దాసరి బాలయ్యతో సినిమా తీసి రాజకీయ మార్పునకు దోహదం చేయాలనే ఉద్దేశంతో ఉన్నట్లు భావిస్తున్నారు. సినిమాలు వేరు, రాజకీయాలు వేరని, తాను కాంగ్రెసుతోనే ఉన్నానని దాసరి నారాయణ రావు చెబుతున్నప్పటికీ ఆయన సవాల్ గానే తీసుకుంటున్నట్లు చెబుతున్నారు.