ఎన్టీఆర్ కు ఎవరూ సాటి రారు: చంద్రబాబు నాయుడు

హైదరాబాద్: తమ పార్టీ వ్యవస్థాపకుడు స్వర్గీయ ఎన్టీ రామారావుకు ఎవరూ సాటి రారని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. ఎన్టీఆర్ ట్రస్టు కార్యవర్గ సమావేశంలో ఆయన శనివారం మాట్లాడారు. ఎన్టీఆర్ భావి తరాలకు ఆదర్శమని ఆయన అన్నారు. ఎన్టీ రామారావు ప్రవేశపెట్టిన పథకాలు ప్రజలకు చేసిన మేలు మరువరానిదని, ఎన్టీఆర్ ప్రవేశపెట్టిన పథకాలు దేశవ్యాప్తంగా అందరికీ ఆదర్శంగా నిలిచాయని ఆయన అన్నారు.

ఎన్టీఆర్ అతి తక్కువ సమయంలో పెను మార్పులు తెచ్చారని ఆయన కొనియాడారు. తెలుగు ప్రజల ఆత్మగౌరవాన్ని ప్రపంచవ్యాప్తంగా నిలబెట్టిన ఘనత ఎన్టీఆర్ దేనని ఆయన అన్నారు. పార్టీ కోసం త్యాగాలు చేసిన వారిని తాము మర్చిపోమని, జీవితంలో నిలదొక్కుకోవడానికి ట్రస్టు తరఫున అన్ని విధాలా సహకారం అందిస్తామని ఆయన చెప్పారు. స్వర్గీయ ఎన్టీఆర్ పై ప్రముఖ జర్నలిస్టు పొత్తూరి వెంకటేశ్వర రావు రాసిన పుస్తకాన్ని చంద్రబాబు ఆవిష్కరించారు.