తెలంగాణ ఉప ఎన్నికలపై చిరంజీవి ఉక్కిరి బిక్కిరి

హైదరాబాద్: తెలంగాణలోని 12 శాసనసభా స్థానాలకు జరిగే ఉప ఎన్నికలకు ప్రజారాజ్యం పార్టీ అధ్యక్షుడు చిరంజీవికి చిక్కు సమస్యనే తెచ్చి పెట్టాయి. పోటీ చేయాలా, వద్దా అనే విషయంపై చిరంజీవి మీమాంసను ఎదుర్కుంటున్నారు. తెలంగాణలో పోటీ చేయడం, తెలంగాణలో ప్రచారానికి వెళ్లడం ఆయనకు అంత సులభం కాదు. సమైక్య నినాదం పుచ్చుకునే సీమాంధ్రలో విస్తృతంగా పర్యటించిన చిరంజీవి తెలంగాణలో అడుగు పెట్టే పరిస్థితి లేదు. పోటీ చేయకపోతే భయపడి తప్పుకున్న అభిప్రాయం కలుగుతుంది. పైగా, తెలంగాణలోని పలు జిల్లాల నాయకులు ప్రజారాజ్యం పార్టీకి రాజీనామా చేశారు. ఈ స్థితిలో ఎన్నికల బాధ్యతలను స్థానిక నాయకత్వాలకు అప్పగించే పరిస్థితి కూడా లేదు.

కాంగ్రెసుకు మద్దతు ప్రకటించాలా, వద్దా అనే విషయంపై కూడా చిరంజీవి సందిగ్ధంలోనే ఉన్నట్లు సమాచారం. మద్దతిస్తే కాంగ్రెసు తీసుకుంటుందా అనేది కూడా అనుమానమే. సమైక్యవాద వైఖరిని తీసుకున్న చిరంజీవి మద్దతును కాంగ్రెసు పార్టీ తీసుకునే అవకాశాలు కూడా తక్కువే. కాంగ్రెసుకు మద్దతిస్తున్నట్లు ఏకపక్షంగా ప్రకటించే పరిస్థితి కూడా లేదు. అలా ప్రకటిస్తే, కాంగ్రెసు తిరస్కరించే అవకాశాలే ఉన్నాయి. దీనివల్ల ఉన్న పరువు కూడా పోతుంది. ఏమైనా, రెండు మూడు రోజుల్లో తెలంగాణలోని ఉప ఎన్నికలపై ప్రజారాజ్యం పార్టీ ఓ నిర్ణయం తీసుకుంటుందని భావిస్తున్నారు.