నెల్లూరు జిల్లాలో గజదొంగ వెంకటేశ్వర్లు ఎన్ కౌంటర్

నెల్లూరు: నెల్లూరు జిల్లాలో మంగళవారం తెల్లవారు జామును పీరిగ వెంకటేశ్వర్లు అనే గజదొంగ ఎన్ కౌంటర్లో మరణించాడు. అతను బిట్రగుంటకు చెందినవాడు. మర్రిపాడు మండలం దుత్తలూరు వద్ద మంగళవారం తెల్లవారు జామున వెంకటేశ్వర్లు లారీలను ఆపి దోపిడీకి పాల్పడుతుండడాన్ని పోలీసులు కనిపెట్టారు. అతన్ని వారు అడ్డుకునే ప్రయత్నం చేశారు. ఈ సమయంలో పోలీసులపైకి వెంకటేశ్వర్లు కాల్పులు జరిపాడు. ప్రతిగా పోలీసులు ఎదురు కాల్పులు జరిపారు. ఈ ఎదురు కాల్పుల్లో వెంకటేశ్వర్లు మరణించినట్లు జిల్లా ఎస్పీ చెప్పారు.

వెంకటేశ్వర్లుపై పలు జిల్లాలో దొంగతనాలు, దోపిడీలు, హత్య, అత్యాచారాలకు సంబంధించిన 34 కేసులున్నట్లు ఎస్పీ తెలిపారు. ప్రకాశం జిల్లాలో ఓ ఎస్ఐపై హత్యాప్రయత్నం జరిగిన కేసులో కూడా ఇతను నిందితుడు. అయితే, వెంకటేశ్వర్లును పోలీసులు పట్టుకుని కాల్పి చంపారని అతని భార్య విజయ ఆరోపిస్తోంది. వారం రోజుల క్రితం వెంకటేశ్వర్లును పోలీసులు అదుపులోకి తీసుకున్నారని ఆమె చెబుతోంది.