కదిరి ఏడు కోట్ల డబ్బుతో చంద్రబాబు నాయుడు లింక్

హైదరాబాద్: అనంతపురం జిల్లా కదిరిలో పట్టుబడిన ఏడు కోట్ల రూపాయల వ్యవహారంతో తెలుగుదేశం పార్టీ అధ్యక్షుడు నారా చంద్రబాబునాయుడికి లింక్ కలుపుతూ వార్తాకథనాలు వెలువడుతున్నాయి. ప్రధానంగా సాక్షి టీవీ చానెల్ ఇందుకు సంబంధించిన వార్తాకథనాన్ని ప్రసారం చేస్తోంది. అనంతపురం జిల్లా కదిరిలోని వాహనం నుంచి పోలీసులు బుధవారం రాత్రి ఐదు వందల నోట్ల ఏడు కోట్ల రూపాయలను పోలీసులు స్వాధీనం చేసుకున్నారు. ఆ వాహనం తెలుగుదేశం పార్టీ నాయకుడు పేరం హరిబాబుది. ఈ క్యాష్ స్కామ్ లో పోలీసులు అరెస్టు చేసిన ఐదుగురిలో పేరం హరిబాబు తండ్రి పేరం రామకృష్ణయ్యనాయుడు కూడా ఉన్నారు.

వాహనంలో ఇతర నెంబర్ ప్లేట్లు ఉన్నాయి. వాటిలో చంద్రబాబు వాహనానికి సంబంధించిన నెంబర్ ప్లేటు కూడా ఉంది. దీంతో చంద్రబాబుకు ఆ డబ్బుతో లింక్ పెట్టారు. తమను అరెస్టు చేసినప్పుడు తమకు చంద్రబాబు బంధువు అని రామకృష్ణయ్య చెప్పారని అంటున్నారు. డబ్బులతో పట్టుబడిన వాహనం చంద్రబాబు ఎన్నికల ప్రచారంలో కూడా తిరిగిందని సాక్షి టీవీ వార్తాకథనం ప్రసారం చేస్తోంది. చంద్రబాబుకు పేరం హరిబాబు అత్యంత సన్నిహితుడని సాక్షి టీవీ చెబుతోంది. 2004 ఎన్నికల్లోనూ, 2009 ఎన్నికల్లోనూ చంద్రగిరి టికెట్ కోసం ప్రయత్నించి హరిబాబు విఫలమయ్యాడని చెబుతున్నారు.