ఏడు కోట్లు ఎక్కడివి: టిడిపి నేత హరిబాబు ఇంట్లో సోదాలు

తిరుపతి: తెలుగుదేశం పార్టీ నాయకుడు పేరం హరిబాబు నివాసంలో ఆదాయం పన్ను శాఖ అధికారులు సోదాలు నిర్వహించారు. గురువారం ఉదయం 9 గంటల నుంచి వారు ఈ సోదాలు చేపట్టారు. అనంతపురం జిల్లా కదిరిలో హరిబాబుకు చెందిన వాహనంలో ఏడు కోట్ల రూపాయల నోట్ల కట్టలు పట్టుబడిన నేపథ్యంలో ఈ సోదాలు నిర్వహిస్తున్నట్లు తెలుస్తోంది. కదిరిలోని డాబా వద్ద ఆగి ఉన్న వాహనంలో పోలీసులు బుధవారంనాడు ఏడు కోట్ల రూపాయలను కనిపెట్టి, వాహనాలకు చెందిన వ్యక్తులను అదుపులోకి తీసుకున్నారు.

ఆ ఏడు కోట్ల రూపాయల గుట్టు విప్పడానికి ఐటి అధికారులు సోదాలు నిర్వహించినట్లు సమాచారం. డాబా వద్ద ఆగి ఉన్న వాహనాలను తనిఖీ చేసిన సమయంలో ఏడు కోట్ల రూపాయలు పోలీసుల కంట పడ్డాయి. మార్చడానికి వీలుగా వాహనాల్లో నెంబర్ ప్లేట్లు ఉండడం, వాహనాల్లో ప్రయాణిస్తున్నవారి వద్ద వాకీటాకీలు ఉండడం వల్ల పోలీసులు అనుమానాలు వ్యక్తం చేస్తున్నారు. ఆ డబ్బు ఎక్కడిది, ఎక్కడి నుంచి ఎక్కడికి తరలిస్తున్నారు వంటి విషయాలపై పోలీసులు దృష్టి సారించారు.