ముస్లిం రిజర్వేషన్ల ఘనత వైయస్ దే: వైయస్ జగన్

కడప: విద్య, ఉద్యోగాల్లో ముస్లింలకు నాలుగు శాతం రిజర్వేషన్లు కల్పించిన ఘనత దివంగత నేత వైయస్ రాజశేఖర రెడ్డిదేనని కాంగ్రెసు కడప పార్లమెంటు సభ్యుడు వైయస్ జగన్మోహన్ రెడ్డి అన్నారు. మైనారిటీ ఉద్యోగులు ఏర్పాటు చేసిన కార్యక్రమంలో ఆయన గురువారం మాట్లాడారు. పదవీ విరమణ చేసేనాటికి ప్రభుత్వ ఉద్యోగులందరికీ ఇళ్ల స్థలాలు ఉండాలని ఉత్తర్వులు జారీ చేసింది కూడా వైయస్సేనని ఆయన కొనియాడారు.

అంతకు ముందు జగన్ రిమ్స్ సమీపంలో వైయస్సార్ జర్నలిస్టు కాలనీకి భూమిపూజ చేశారు. వైయస్ హయాంలో జర్నలిస్టు కాలనీకి 20 ఎకరాల స్థలం కేటాయించినట్లు ఆయన తెలిపారు. మార్కెట్ రేటు ప్రకారం కాకుండా ఎకరా రెండు లక్షల రూపాయలతోనే భూమిని కేటాయించినట్లు ఆయన చెప్పారు.