బాబు లింక్: సాక్షి టీవీపై టిడిపి నేత వర్ల మండిపాటు

హైదరాబాద్: అనంతపురం జిల్లా కదిరిలో పట్టుబడిన ఏడు కోట్ల రూపాయల వాహనం వ్యవహారంపై సాక్షి టీవీ చానెల్ తమ పార్టీ అధ్యక్షుడు నారా చంద్రబాబు నాయుడికి లింక్ పెడుతూ వార్తాకథనాన్ని ప్రసారం చేసిన సాక్షి టీవీ చానెల్ పై తెలుగుదేశం పార్టీ నాయకుడు వర్ల రామయ్య తీవ్రంగా మండిపడ్డారు. ఏడు కోట్ల క్యాష్ స్కామ్ తో చంద్రబాబుకు సంబంధం ఉందని సాక్షి టీవీ చానెల్ ఆరోపించడాన్ని తాము తీవ్రంగా పరిగణిస్తున్నామని ఆయన గురువారం మీడియా ప్రతినిధుల సమావేశంలో అన్నారు. సాక్షి టీవీ చానెల్ పై పరువు నష్టం దావా వేస్తామని ఆయన చెప్పారు.

ఇదిగో తోక అంటే, అదిగో పులి మాదిరిగా కాంగ్రెసు పార్లమెంటు సభ్యుడు వైయస్ జగన్ కు చెందిన సాక్షి చానెల్ వార్తాకథనం ఉందని ఆయన వ్యాఖ్యానించారు. క్యాష్ స్కామ్ తో చంద్రబాబుకు ఏ విధమైన సంబంధం లేదని ఆయన అన్నారు. ఏడు కోట్ల రూపాయలు తమ నాయకుడు పేరం హరిబాబువేనని, అది చట్టబద్దమైన డబ్బేనని, హరిబాబుకు తాము మద్దతుగా నిలుస్తామని ఆయన చెప్పారు. క్యాష్ పట్టుబడిన వాహనంలో చంద్రబాబు వాహనం నెంబర్ ప్లేట్ ఉన్నంత మాత్రాన చంద్రబాబుకు లింక్ పెట్టడం సరి కాదని ఆయన అన్నారు.