తెలంగాణ ఉప ఎన్నికల్లో పోటీపై టిడిపిలో విభేదాలు

హైదరాబాద్‌: తెలంగాణలో జరిగే ఉప ఎన్నికల్లో పోటీపై తెలుగుదేశం పార్టీ నాయకులు భిన్నాభిప్రాయాలు వ్యక్తం చేస్తున్నారు. ఉప ఎన్నికలపై చర్చించేందుకు పార్టీ అధ్యక్షుడు నారా చంద్రబాబు నాయుడు గురువారం సాయంత్రం ఏర్పాటు చేసిన తెలంగాణ సీనియర్ నాయకుల సమావేశంలో విభేదాలు బయటపడ్డాయి. టి. దేవేందర్ గౌడ్, మండవ వెంకటేశ్వర రావు, నాగం జనార్దన్ రెడ్డి, కడియం శ్రీహరి ఈ సమావేశంలో పాల్గొన్నారు. ఉప ఎన్నికల్లో పోటీపై చంద్రబాబు వారితో చర్చించారు. పోటీ చేయాలని దేవేందర్ గౌడ్, మండవ వెంకటేశ్వర రావు అభిప్రాయపడ్డారు. నాగం జనార్దన్ రెడ్డి, కడియం శ్రీహరి పోటీ చేయకపోతేనే మంచిదని అభిప్రాయపడ్డారు.

పోటీ చేయకపోతే క్యాడర్ పోతుందని దేవేందర్, మండవ అభిప్రాయపడినట్లు సమాచారం. పార్టీ నాయకుల మధ్య విభేదాలు పొడసూపడంతో చంద్రబాబు తెలంగాణ జిల్లాల పార్టీ కార్యకర్తలతో మాట్లాడారు. పోటీ చేస్తేనే మంచిదని కార్యకర్తలు తమ అభిప్రాయం వ్యక్తం చేసినట్లు చంద్రబాబు చెప్పారు. దీంతో ఉప ఎన్నికల్లో పోటీ చేయాలని చంద్రబాబు నిర్ణయించారు.