అమెరికాలో ఆంధ్రుడు కట్టమంచి వెంకట్ దారుణ హత్య

డెట్రాయిట్: అమెరికాలోని డెట్రాయిట్ లో వెంకట్ కట్టమంచి అనే ఆంద్రప్రదేశ్ వ్యక్తిని దుండగులు కాల్చి చంపారు. అతను చిత్తూరు జిల్లా వాసి. మిషిగన్ రాష్ట్రంలోని డెట్రాయిట్ సమీపంలో గల లిగోనియా అనే ప్రాంతంలో ఈ ఘటన జరిగినట్టు ప్రాథమిక సమాచారం బట్టి తెలుస్తున్నది. వెంకట్ కట్టమంచి వారం రోజుల క్రితం ఆన్‌లైన్‌లో తన సెల్‌ఫోన్‌ను విక్రయానికి ఉంచగా ఒక మెక్సికన్ యువతి ఆసెల్‌ఫోన్ కొనుగోలుకు ఫోన్ చేసింది. అప్పుడు వెంకట్ స్వయంగా వెళ్ళి ఆ యువతకి సెల్‌ఫోన్ విక్రయించి వెనక్కి వచ్చాడు. అనంతరం గురువారం రాత్రి 12 గంటల ప్రాంతంలో ఒక రెస్టారెంట్‌కు రావలసిందిగా మెక్సికన్ యువతి ఆహ్వానించడంతో వెంకట్ అక్కడికి వెళ్ళాడు.

వెంకట్ కారులోంచి దిగడానికి యత్నిస్తున్న సమయంలోనే నలుగురు దుండగులు ఆ యువతితో కలిసి వచ్చి వెంకట్ వద్ద ఉన్న విలువైన వస్తువులు గుంజుకోవడానికి యత్నించారు. వెంకట్ పెనుగులాడుతూ వారి నుంచి తప్పించుకుని సమీపంలోని మోటెల్ వైపు పరుగులు తీశాడు. అక్కడ ఎవరూ తలుపులు తీయకపోవడంతో మరో వైపు పారిపోవడానికి వెంకట్ మళ్ళి యత్నించాడు. అంతలో దుండగులు అతనిపై కాల్పులు జరపడంతో వెంటక్ అక్కడికక్కడే మరణించాడు. కాల్పుల శబ్ధం విని ఒక మహిళ పోలీసులకు ఫోన్ చేయడంతో పోలీసులు ఆ ఐదుగుర్ని వెంటనే పట్టుకోగలిగారు. నిందితులు ప్రస్తుతం పోలీసుల అదుపులో ఉన్నారు.