ఎన్టీఆర్ విగ్రహ ప్రతిష్ఠాపనకు ఆనంతో బాలయ్య భేటీ

హైదరాబాద్‌: ప్రముఖ నటుడు, తెలుగుదేశం నాయకుడు నందమూరి బాలకృష్ణ పురపాలక శాఖ మంత్రి ఆనం రాంనారాయణరెడ్డిని హైదరాబాదులోని మినిస్టర్స్‌ క్వార్టర్స్‌లో శనివారం కలిశారు. ఫిలింనగర్‌లో తన తండ్రి స్వర్గీయ నందమూరి తారకరామారావు విగ్రహ ఏర్పాటుకు అనుమతి ఇవ్వాలని బాలయ్య ఆనంను కోరారు.

బాలకృష్ణతో పాటు డీవీఎస్‌ రాజు ఫిలింనగర్‌ సొసైటీ తరఫున మంత్రికి వినతి పత్రం సమర్పించారు. ఈ అంశాన్ని ముఖ్యమంత్రితో చర్చించి తగు నిర్ణయం తీసుకుంటామని మంత్రి హామీ ఇచ్చారు. పనిలో పనిగా దివంగత నేత వైయస్ రాజశేఖర రెడ్డి విగ్రహాన్ని కూడా ఫిల్మ్ నగర్ లో ప్రతిష్టించాలని బాలయ్య మంత్రిని కోరినట్లు తెలుస్తోంది.