ఉప ఎన్నికల్లో ఆరు స్థానాలకు టిడిపి అభ్యర్థుల వెల్లడి

హైదరాబాద్: తెలంగాణలో 12 శాసనసభా స్థానాలకు జరిగే ఉప ఎన్నికల్లో ఆరు స్థానాలకు తెలుగుదేశం పార్టీ అభ్యర్థులను ఖరారు చేసింది. అభ్యర్థుల పేర్లను తెలుగుదేశం పార్టీ ప్రకటించింది. పార్టీ అధ్యక్షుడు నారా చంద్రబాబు నాయుడు సోమవారం పార్టీ సీనియర్లతో సమావేశమై అభ్యర్థులను ఖరారు చేశారు. మిగతా ఆరు స్థానాలకు ఎన్నికల నోటిఫికేషన్ విడుదలైన తర్వాత ప్రకటించాలని పార్టీ నిర్ణయించింది.

సిర్పూరు నుంచి పాల్వాయి రాజ్యలక్ష్మిని, చెన్నూరు నుంచి బొడ జనార్దన్ ను, మంచిర్యాల నుంచి గోనె హనుమంతరావును, నిజామాబాద్ అర్బన్ నుంచి ఎస్ఎ అలిన్ ను, కోరుట్ల నుంచి విశ్వనాథాన్ని, వేములవాడ నుంచి సుధాకర రావును పోటీకి దించాలని తెలుగుదేశం పార్టీ నిర్ణయించింది. తెలంగాణ ఉప ఎన్నికల్లో చంద్రబాబు ప్రచారం చేసే విషయంపై సమావేశంలో ఏ విధమైన నిర్ణయం తీసుకోలేదు.