చంద్రబాబుకు శృంగభంగం తప్పదు: హరీష్ రావు

హైదరాబాద్‌: తెలంగాణ ఉప ఎన్నికల్లో తెలుగుదేశం పార్టీ అధ్యక్షుడు నారా చంద్రబాబునాయుడికి శృంగభంగం తప్పదని తెలంగాణ రాష్ట్ర సమితి (తెరాస) నాయకుడు హరీష్ రావు అన్నారు. తెలంగాణలో 12 స్థానాలకు జరిగే ఉప ఎన్నికల్లో ఆరు స్థానాలకు తెలుగుదేశం పార్టీ అభ్యర్థులను ఖరారు చేయడంపై ఆయన సోమవారం ప్రతిస్పందించారు. తెలుగుదేశం పార్టీ ఏ ముఖం పెట్టుకుని ఎన్నికల్లో పోటీ చేస్తుందని ఆయన ప్రశ్నించారు. తెలంగాణ ఉప ఎన్నికల్లో పోటీపై జరుగుతున్న తెలుగుదేశం పార్టీ సమావేశాల్లో చంద్రబాబు తెలంగాణ పేరు కూడా ఉచ్చరించడానికి ఇష్టపడడం లేదని, అటువంటి నాయకుడికి తెలంగాణలో పోటీ చేయించే హక్కు ఉండదని ఆయన అన్నారు.

ఉప ఎన్నికల్లో తెలుగుదేశం పార్టీ అభ్యర్థులకు డిపాజిట్లు కూడా దక్కవని ఆయన అన్నారు. తెలుగుదేశం పార్టీలో తెలంగాణ నాయకులకు అవమానం జరుగుతోందని ఆయన అభిప్రాయపడ్డారు. తెలంగాణకోసం ఆత్మహత్యలు చేసుకున్న విద్యార్థులకు నివాళులు అర్పిస్తూ పార్టీ మహానాడులో తీర్మానం పెట్టాలని నాగం జనార్దన్ రెడ్డి చేసిన విజ్ఞప్తిని చంద్రబాబు పట్టించుకోలేదని, కాంగ్రెసు పార్లమెంటు సభ్యుడు జగన్ తెలంగాణ పర్యటనను అడ్డుకుంటామని చెప్పిన ఎర్రబెల్లి దయాకర్ రావును హరికృష్ణ అవమానించారని, తెలుగుదేశం పార్టీలో తెలంగాణ నాయకులకు ఏ మాత్రం గౌరవం లేదని ఆయన అన్నారు.

తెలంగాణపై ఏర్పడిన శ్రీకృష్ణ కమిటీకి నివేదిక ఇవ్వలేని దుస్థితిలో చంద్రబాబు ఉన్నారని, తెలంగాణపై తన వైఖరిని కూడా చెప్పలేక పోతున్నారని, ఈ స్థితిలో ఏం చెప్పి తెలంగాణ ప్రజల ఓట్లు అడుగుతారో తెలియడం లేదని ఆయన అన్నారు. తెలుగుదేశం పార్టీకి తెలంగాణలో పోటీ చేయడానికి ఎజెండా లేదని ఆయన అన్నారు.