చంద్రబాబు సమావేశాలకు తెలంగాణ సీనియర్లు డుమ్మా

హైదరాబాద్: తెలంగాణ ఉప ఎన్నికలపై చర్చించేందుకు తెలుగుదేశం పార్టీ అధ్యక్షుడు నారా చంద్రబాబు నాయుడు నిర్వహిస్తున్న సమావేశాలకు తెలంగాణ సీనియర్లు వరుసగా డుమ్మా కొడుతున్నారు. సోమవారం జరిగిన సమావేశానికి కూడా పలువురు సీనియర్లు గైర్హాజరయ్యారు. రమేష్‌ రాథోడ్‌, నాగం జనార్ధన్‌ రెడ్డి, ఎర్రబెల్లి దయాకరరావు, వేణుగోపాలచారి తదితర నేతలు ఈ సమావేశానికి రాలేదు. తెలంగాణ ఉప ఎన్నికల నోటిఫికేషన్ నాలుగైదు రోజుల్లో రానున్న నేపథ్యంలో ఎన్నికల్లో అనుసరించాల్సిన వ్యూహంపై, అభ్యర్థుల ఖరారుపై చంద్రబాబు సీనియర్ నేతలతో మాట్లాడారు.

కాగా, ఉప ఎన్నికల్లో పోటీపై గత కొద్ది రోజులుగా చంద్రబాబు వరుసగా సమావేశాలు ఏర్పాటు చేస్తున్నారు. ఈ సమావేశాలకు నాగం జనార్దన్ రెడ్డి, ఎర్రబెల్లి దయాకర రావు, కడియం శ్రీహరి హాజరు కావడం లేదు. ఉప ఎన్నికల్లో పోటీ చేయకూడదని ఈ నాయకులు వాదిస్తూ వస్తున్నారు. అయితే, పార్టీ క్యాడర్ పోటీ చేయాలని అంటోందని, 12 స్థానాల్లో కనీసం ఆరు స్థానాలు గెలుస్తామని చంద్రబాబు సమావేశాల్లో ఊదరగొడుతూ వస్తున్నారు. దీంతో విసిగిపోయిన తెలంగాణ సీనియర్ నాయకులు సమావేశాలకు దూరంగా ఉంటున్నారు.