తెలంగాణ ఉప ఎన్నికల్లో పోటీకి చిరు పార్టీ దూరమే

హైదరాబాద్‌: తాను అందరివాడిని అని ప్రకటించుకున్న ప్రజారాజ్యం పార్టీ అధ్యక్షుడు చిరంజీవి తెలంగాణ ప్రాంతానికి కాకుండా పోతున్నారు. తెలంగాణలోని పది స్థానాలకు జరిగే ఉప ఎన్నికల్లో పోటీ చేయలేని స్థితిలో చిరంజీవి ప్రజారాజ్యం పార్టీ పడింది. సమైక్యాంధ్ర నినాదంతో సీమాంధ్రలో పర్యటించి ఆయన తెలంగాణ ప్రజలకు దూరమయ్యారు. దీంతో తెలంగాణలో జరిగే ఉప ఎన్నికల్లో పోటీ చేయకూడదని ప్రజారాజ్యం పార్టీ ఒక నిర్ణయానికి వచ్చింది. అయితే, ఈ విషయాన్ని పార్టీ అధికారికంగా ప్రకటించలేదు.

ఉప ఎన్నికల్లో తాను ఎటు ఉండబోతుందనే విషయాన్ని కూడా చిరంజీవి ప్రకటించలేని స్థితిలో ఉంది. కాంగ్రెసు పార్టీకి తాము మద్దతు ఇవ్వబోమని ప్రజారాజ్యం ఇది వరకే ప్రకటించింది. చిరంజీవి మద్దతిచ్చినా తీసుకునే స్థితిలో కాంగ్రెసు లేదు. తెలంగాణ నినాదంతో ఎన్నికల్లో పోటీ చేస్తున్న కాంగ్రెసు సమైక్యవాది అయిన చిరంజీవి మద్దతు తీసుకోదనే విషయం అందరికీ తెలిసిందే. అయితే, రెండు, మూడు రోజుల్లో పార్టీ ముఖ్య నాయకులు సమావేశమై తమ వైఖరి ప్రకటించనున్నారు. తెలంగాణలో ఉద్రిక్త పరిస్థితులు ఉన్నందున ఉప ఎన్నికలను వాయిదా వేయాలని ప్రజారాజ్యం ఇది వరకు డిమాండ్ చేసింది.