కోదందరామ్ తమాషా చేస్తున్నారు: దానం నాగేందర్

హైదరాబాద్‌: తెలంగాణ రాజకీయ జెఎసి పేరుతో ప్రొఫెసర్ కోదండరామ్ తమాషా చేస్తున్నారని రాష్ట్ర ఆరోగ్య శాఖ మంత్రి దానం నాగేందర్ వ్యాఖ్యానించారు. గెలుస్తామనే నమ్మకంతోనే తాము తెలంగాణ ఉప ఎన్నికల్లో పోటీ చేస్తున్నామని ఆయన మంగళవారం మీడియా ప్రతినిధుల సమావేశంలో అన్నారు. ఉప ఎన్నికల్లో తమ కాంగ్రెసు పార్టీ క్లీన్ స్వీప్ చేస్తుందని ఆయన ధీమా వ్యక్తం చేశారు. అన్ని స్థానాల్లో గెలవాలనే పట్టుదలతోనే కాంగ్రెసు పోటీ చేస్తుందని ఆయన చెప్పారు.

తెలంగాణ ఇచ్చేది తెచ్చేది కాంగ్రెసు పార్టీయేనని, కొంత మంది శాసనసభ్యుల వల్ల తెలంగాణ రాదని ఆయన అన్నారు. ఉప ఎన్నికల్లో అమర వీరుల కుటుంబాలకు టికెట్లు ఇవ్వాలనే విద్యార్థుల డిమాండ్ సమంజసమైందేనని, అయితే తెలంగాణ రాష్ట్ర సమితి (తెరాస) దానిపై మాట్లాడలేదని ఆయన అన్నారు.