సూపర్ మోడల్ వివేకా ఆత్మహత్య: బాయ్ ఫ్రెండ్ పై అనుమానం

ముంబై: సూపర్ మోడల్ వివేకా బాబాజీ ఆత్మహత్య కేసులో పోలీసులు ఆమె బాయ్ ఫ్రెండ్ గౌతం వోహ్రాను అనుమానిస్తున్నారు. గౌతం వోహ్రాను ప్రశ్నించడానికి నిర్ణయించుకున్న పోలీసులు ఆయనకు సమన్లు కూడా జారీ చేశారు. దీంతో ముందస్తు బెయిల్ కోసం అతను హైకోర్టును ఆశ్రయించేందుకు సిద్ధపడుతున్నాడు. గౌతం స్టాక్ బ్రోకర్. తన ఆత్మహత్యకు గౌతం కారణమని వివేకా బాబాజీ తన స్యూసైడ్ నోటులో రాసింది. దీంతో పోలీసులు అతనిపై చర్యలకు రంగం సిద్ధం చేసుకుంటున్నారు.

వివేకాకు, గౌతంకు మధ్య ఏ విధమైన సంబంధం ఉందనే కోణంలో పోలీసులు ఆలోచనలు చేస్తున్నారు. వారిద్దరి మధ్య ఈ నెల 24వ తేదీన జరిగిన కలయికపై కూడా పోలీసులు దృష్టి పెట్టారు. కామసూత్ర మోడల్ వివేకా బాబాజీ దారుణంగా మరణించిన విషయం తెలిసిందే. బాంద్రాలోని హోటల్ గదిలో సీలింగ్ ఫ్యాన్ కు వేలాడుతూ శుక్రవారం ఆమె మృతదేహం కనిపించింది. గౌతం తెగదెంపులు చేసుకోవడంతో మానసికంగా కృంగిపోయి ఆమె ఆత్మహత్య చేసుకుని ఉండవచ్చునని పోలీసులు భావిస్తున్నారు. వివేకా ఆత్మహత్యకు సంబంధించి పోలీసులు పలు ఆధారాలు సేకరించారు.